आज नेपाली कांग्रेसको देशैभर चियापान कार्यक्रम हुँदै

काठमाडौं : नेपाली कांग्रेसले यस वर्षको दशैँ, तिहार, छठलगायत चाडपर्वका अवसरमा आज देशैभर चियापान कार्यक्रम गर्दैछ । उपत्यकामा पार्टीको केन्द्रीय कार्यालय सानेपा ललितपुरमा दिउँसो १ बजेदेखि साँझ ५ बजेसम्म शुभकामना आदान–प्रदान तथा चियापान कार्यक्रम राखिएको छ । बाँकी ७६ वटै जिल्लामा पनि चियापान कार्यक्रम राखिएको प्रवक्ता विश्वप्रकाश शर्माले जानकारी दिए ।

उपत्यकामा हुने चियापान कार्यक्रममा विभिन्न राजनीतिक दलका नेताहरू, नेपाल सरकारका मन्त्रिपरिषद् सदस्यहरू, संवैधानिक निकायका प्रमुखहरू, माननीय सांसदहरू, राष्ट्रसेवक कर्मचारीहरू, सुरक्षा निकायका प्रमुखहरू, कुटनीतिक नियोगका प्रमुखहरू, लेखक, साहित्यकार, कलाकार, उद्योगपति एवं व्यवसायीहरूलाई आमन्त्रण गरिएको छ ।

यस्तै, पेसागत एवं बुद्धिजीवीहरू, नागरिक समाजका अगुवाहरू, मानव अधिकारकर्मीहरू, विभिन्न सञ्चार माध्यमका प्रमुखहरू, पत्रकार, गैर–आवासीय नेपाली संघ–संस्थाका प्रमुखहरू लगायतका विशिष्ट महानुभावहरू, नेपाली कांग्रेसका सदस्यहरू एवं शुभेच्छुकहरूको सहभागिता रहने प्रवक्ता शर्माले जानकारी दिए ।

जिल्ला–जिल्लामा हुने चियापान कार्यक्रममा भने जिल्लास्तरका विभिन्न संघ–संस्थाका प्रतिनिधिहरू, जिल्लास्तरकै नेता–कार्यक्रताहरूको सहभागिता रहनेछ ।

विजयादशमी, तिहार, नेपाल संवत्, छठलगायत पर्वहरूको अवसरमा राजनीतिक दलले अघिल्ला वर्षदेखि नै चियापान गर्दै आइरहेका छन् । सत्तारूढ नेकपाले पनि विगत वर्षहरूमा जस्तै यस वर्ष पनि असोज २९ गते काठमाडौंमा चियापान गर्दैछ ।

Facebook Comments Box

You May Also Like

Leave a Reply

Your email address will not be published. Required fields are marked *